Masayrka waa masiibo qarsoon" ( sheeko dhab ah ) Qeybtii 1 aad

 

 Sheekadan waa sheeko dhab ah oo ka dhacday wadan wadamada Yurub ka mid ah,waa sheeko waxbadan laga faa'iidayo .

Magaca sheekadu waxa uu yahay "Masayrka waa masiibo qarsoon"

Dunidan aynu ku nool nahay doodi kama taagna in Jaceylku uu yahay wax jira oo Ilahay  Aadmigiisa ku abuuray ,qofkasta oo aad waydiiso waxa uu yahay jacaylku waxa uu ku sheegayaa in uu jacaylku jiro balse waxa laga yabaa in qofkastaba uu qaab gooniya u fasiro.

Qofka uu jacaylku hayaa wuxuu la mid yahay , qof saaran Doon Bilaa shiraac ah oo badwaynta dhexdeeda ay mawjadaha baddu ay marba meel ku tuurayaan,cid uu miciin sadaana aanay jirin .

 

Qaybta koowaad ee sheekada :-

 

Kariima waa gabadh Somaliyeed oo qurux badan , waa gabadh midabka ugu fiican ee maariin-dhalaalka xiga leh,waa gabadh wajigeeda ka dhawrtay is-cadaynta aan cilmiga ku dhisnayn ee dumarkii Somaliyeed qaar ka mid ah lagu ibtileeyay ,waa gabadh dhererkeedu meel dhexaad tahay ,waa gabadh jiniyad leh oo muuqeeda marqudha aanad ka jeesanayn.

Kariima qofkasta oo arkaa amma bartaa waa gabadh aanu ka xiiso goynayn, bulshonimo iyo bashaashnimo diin ku salaysanna Ilahay ku manaystay ,waa gabadh ku dadaasha in ay ka fogaato waxkasta oo ay isleedahay sharafteeda iyo dadnimadeeda ayuu dhawacayaa.

Kariima waa gabadh ay adag tahay in si fudud ay u duufsadaan ,dhalinyarada iyo dhabcalada inta badan aan dhawrin dadnimada iyo sharafta gabdhaha Somaliyeed ,waa gabadh ka dhiidhida xumo dhamantii ,tasoo gabdhaha la dhigaalka ahna ku dhiirisa in ay dhag xumo dhamaan teed ka dhawr-sadaan.sidoo kale waa gabadh ku fiican waxtarka iyo taakulaynta dadka, Kariima waxa ay ka dhalatay Qoys Somaliyeed oo sharaf iyo karaamo ku dhex lahaa dadkii ay la degaanka aheeyd ,waxay ka dhalatay qoys aan dhaqaale buuran haysan , waxa ay la noolayd Aabo iyo Hooyo u duuban sidii ay nolosheeda iyo tan caruurta ay walalaha yihiinba u daryeeli lahayeen.

 

Wakhti lagu qiyaasi karo kun sagaal boqol, sagaashan iyo saddex dii ayaa Kariima waxa ay hoyadeed ku dhimatay dalka Somaliya iyada oo u dhimatay xanuun kusoo boodo ahaa , waxaa sidoo kale rabshadahii wakhtigaasi dalka ka jiray isagana dhawac kasoo gaadhay abaheed ,intaasi wixii ka danbeeyay Kariima iyo caruurtii kale ee ay walalaha ahaayeenba waxa soo food saartay duruuf aad u adag.

Kariima iyo caruurtii ay walalaha ahayeenba, waxa uu qorshahoodu noqday in ay kala qaybsadaan dadkii ehelka ugu dhawaa sida Eedooyinkii iyo Habaryarahii iyo wixii la mid ah taasi waxa ay sababtay in dhamaan caruurtii walaalaha ahaa ee is-dugsanayay qaarba meel la geeyo duruuf iyo dan timid aawadeed.

 

 DHAMAAD QEYBTA KOOWAAD EE SHEEKADII LA MAGAC BAXDEY

MASEYRKA WAA MUSIIBO QARSOON

LA SOCO QEYBTA LABAAD INSHA ALLAH